HE MIHI NĀ TE TUMUAKI

"E tipu e rea mō ngā rā o tō ao; ko tō ringa ki ngā rākau a te Pākehā hei oranga mō tō tinana, ko tō ngākau ki ngā taonga a ō tīpuna Māori hei tikitiki mō tō māhunga, ā, ko tō wairua ki tō Atua nāna nei ngā mea katoa."

– Tā Apirana Ngata

Nō mātau o Te Kura Māori o Porirua te whiwhi ki te whakatau i a koe ki tēnei pae tukutuku o tātau, tēnei pae tukutuku e whakatuwhera ana i te ngākau o te kura, nau mai piki mai kake mai rā e hika mā e.

Te Hau o Matariki -  Ka whakaaro atu rā ki ngā mōrehu o tō tātau nei Kura. Rātau i whakatutungihia ai te ahi, kia tū kaha ai tō tātau nei kura. Rātau i whakapeto ngoi ki te whakatūria he kaupapa hai tautāwhi i ngā uri whakatipu o te rohe nei. Tū te kaha, tū te maia, tū te ora e!

Rātau ngā mōrehua kua whetūrangitia atu ai ki tua o Paerau, me te tangi mōteatea nei, te haku atu nei ki a rātau, okioki atu rā, e moe! Waiho mai ō paparahi hai whai atu mā mātau, waiho mai ō kura huna hai taurima mā mātau, kai aku ika ā whiro o te pō, o te ao, tēnā rā koutou katoa.

He Kura te Tangata, te whakamānawa nui a Te Kuripūwai ki ana uri o Ngāti Toa Rangatira. Koia rā te tauāki ka whāia atu e mātau i konei, ki Te Kura Māori o Porirua. Rukuruku, ketuketu, wetewete, tuhuru, rangahaua e ngā uri, e ngā raukura, e ngā kaimahi, e ngā whānau o te kura nei, mau ana te wehi. Nō reira ka rere arorangi ngā whakamānawa ki te mana whenua kua roa e tauwhiro ana i tō tātau nei Kura. E ngā ringa whatiwhati kō o Toa Rangatira, tēnā rā koutou katoa.

E whakapono nui ana te kura nei, ko te tangata te tino taonga. Mā te manaaki i te tangata kia pūāwai ko te mātauranga, ka toitū te whānau, ka pakari te hapori, ā, ka whai oranga ngā whakatipuranga kei te heke mai, kei te heke mai.

Kaitiakitanga – he kaitiaki i te reo, ngā tikanga, te taiao me tētahi ki tētahi.

Manaakitanga – hei whakaū i te aroha, te manaaki me te whakaute kia rangona ai te mana o ia tangata.

Rangatiratanga – hei whakatipu i ngā uri māia, whai whakaaro, whai mana, e tū rangatira ana i roto i tō rātou Māoritanga.

Whai Wāhitanga – hei whakarite kia whai wāhi te katoa ki te reo, ki te ako, ki ngā kaupapa, ki ngā wheako, ki ngā āheinga o te ao, me te eke ki te tihi o angitū.

Nō reira, nau mai ki ngā whānau hou, nau mai hoki mai ki ngā whānau o nāiānei, nau mai ko ngā hua o te pō, o te āo, tēnā rā koutou katoa. Tīhei Mauriora!

Nāku i roto i ngā tauwhirotanga o te Wāhi Ngaro,

Nā Hukarere