Ka noho au ki te mahau o tōku whare ka kite ai te Te Motu Tapu a Tinirau, Taiawhiotia ana te roto nui a Kahumatamomoe,
Hoe ai te waka a Te Arawa i ngā wai ripo ki te toka a Iriirikapua te wāhi i nohoia e Hinemoa ka kite atu i te tomokanga ki Paretehoata marae, aro mai ana ngā tupuna whare a Tutanekai rāua ko Hinemoa, he whare whakaruruhau i te hapū o Te Roro te Rangi,

Ka mātirotiro haere ki te Hauauru ki te maunga Titohea a Taranaki, ki reira hoe ai te waka o Tokomaru ki te waiora o Waiongana. Ka kite atu i te marae o Muru Raupatu e tū mai rā hei whare mō wai, mō te iwi o Te Āti Awa nō runga i te rangi otirā te hapū o Puketapu.

Ka hū peke atu ki te Tairawhiti ki ngā pae maunga a Tararua, hoe hoe hoe rā te waka a Takitimu i te awa o Ruamahanga, ka kitea te marae o Papawai ararā te hapū o Ngāti Moe he huinga tāngata ki Ngāti Kahungunu ki Wairarapa.

Hoki ora mai rā mai i te maunga o Rimutaka ka tikeihia i ngā tahataha o te awa o Heretaunga ki te wai tai o te Whanganui a Tara ka kite atu i te maunga o Ahumairangi tau ana ki te marae o Pipitea he whare āhuru mō te tini me te mano nō ngā hau e whā, te iwi o Ngāti Pōneke
E rere te mānuka tomokia,
Tihei mauri tū Tihei mauri wahine a Kataraina Taepa-Matakātea he kawai nō Te Whānau Taepa.

Rerehua ana te tonga mai o te ra i Whitireia
E huhu ake taku manu taueka puta i te kainga ururua ki te mahau o Toarangatira
te whariki takapau o te aroha.
Ki nga wai whakariporipo o Raukawakawa e rere ana ki te motu tapu o Kapiti te whare wananga o ia o te nui o te wehi o te Toa whakakaupapa i te noho tahi a Awa, a Toa, a Raukawa tihei mauri ora.
Ko Hayley Galo tenei e mihi maioha ki a koutou katoa

Ko Toi-kai-Rākau, Toi-Kai-Tangata, Toi-Te-Huatahi, ka puta ko Rauru-Nui-a-Toi, ko Paikea ka moe ki a Huturangi ka puta ko Pouheni, ko Tarawhakatu, ko Nanaia, mai i Nanaia ka puta ko Pororurangi e!

Ka tū te urunga o te rā ki Hikurangi, ko Murirangawhēnua e tū mihi atu ki te rā.
Ka Wairoro rā, ka puta te pā raki o Waiapu, ka pūhoro, ka piko ki ōku waihapu ki Waiomoko, ki tōku whenua ko Ngāti Konohi. Ka hura te moana uha, ka hura te moana pore, ka Tohe a Ruatapu ki a Kahutia Te Rangi, e hika ko te Huripūreiata ka puta ko Paikea, kei te kimi noa kei rapa noa e hika he whenua mai tawhiti, hoatu tō kauhau taniwha ki uta ki Whāngārā Mai Tawhiti.

He uri waiwai tēnei nō te whānau Tamepo, ka moe a Raniera Tamepo ki a Hohipera Leach, ka puta ko tēnei ko Jacob Wilkins-Hodges, he kaiako ki te Whare Toi o Te Puawaitanga.

Tū ana au ki te tihi o Rangiahua maunga
Anga whakararo ai taku haere ki tōku awa a Wainui
Ki reira kauhoe atu ki runga i tōku waka haunui a Tainui
Hoe tahi ana ki raro i tōku tūpuna rangatira a Hoturoa
Tau ana ki roto o te Waiariki ki Torere

Tahuri taku aro ki te rāwhiti ki te maunga o Tihirau e tū whakahīhī ana,
Ki te awa pōkarekare o Whangaparaoa
Tū ai ko Te Whānau-ā-Apanui ki mua i te poho o Kauaetangohia marae

Ka peka atu ki te maunga titōhea o Taranaki ki a Ngāti Tūpito
Koia ko Aotea waka e pari i ngā tai o Pāteanui awa
ki tahaki o Taiporohenui whare tūpuna

Nei rā te uri o Ngaitai, o Te Whānau-ā-Apanui me Ngāti Ruanui e tuku manahau atu i ngā mihi.
Keanu Andrews, Kaiako Poumua, Te Whānau Te Pakiaka