Mai i te awa o Wainui ki te maunga o Rangiahua. Tiro kau ana ki te moana, hikina whakarunga ko Tōrerenui-a-rua!

He kāwai whakaheke ngā ngare katoa o Ngaitai nō Tōrerenui-ā-rua, te tamāhine o Hoturoa o Tainui waka. Kei ngā rekereke o Rangiahua maunga te wāhi i noho ai a Tōrerenui-ā-rua rāua ko tōna hoa rangatira a Manaakiao, ki reira tutū ai te ahi kā roa o te iwi o Ngaitai.

Taura here-ā-tangata,Taura here ki te whenua,Taura here ki ngā iwi.
He uri hoki tēnei nō te papa kāinga o Hamula i te taone matua o Alofi, Niue

Nei rā te uri o Te Moana Nui ā Kiwa e mihi nei.

Tau atu taku manu ki te tihi o Pureora haere whakararo ki ngā wai riporipo o Waimiha hoea rā te waka o Tainui ki uta hau atu rā ki roto o Mangapehi ki te tūpuna a Rereahu ki te hapū o Rereahu ki te iwi o Ngāti Maniapoto.

Haere whakateuru ki roto o Kawhia moana, Kawhia tangata ki te maunga o Karioi ki te hapū o Ngāti Wehiwehi ki runga o Okapu marae. Nei rā a Ngāti Mahuta e mihi nei.

Titiro ki runga rā, ki Te Wharepūhunga a Kahu
Te kāinga tūturu o Raukawa tupuna, Raukawa tangata
Tū mai ra a Hoturoa rāua ko Takihiku
Hei whakaruruhau mō Raukawa ki Wharepūhunga
Ka huri ki te whakateraki
Ka whākana aku mata ki te kāhiwihiwi o Tararua
Tiro whakararo ra ki te waitārere, waitāhekeheke o Manawatū.
Rere noa atu au ki runga i a Kererū,
ki te whatitoka o Māhinaarangi
Te whare mōwai, mō tōku rahi

Tēnei a Raukawa ki uta, Raukawa ki tai
Takihiku ki uta, Takihiku ki tai
E whakamānawa atu nei ki ngā tōpito o tō tātou kura

Kei te pūmanawa o Te Ika a Māui, e koro Ruapehu tū mai rā
Parikino, e pari nei i te kino ki tōku hapū ki a Ngāti Tuera
Te awa atua, te awa tupua, e ko Whanganui
Te tupuna, te tawhito, Haunui-a-Pāpārangi
Ngā wai inuinu o Ruatipua ērā
Ngā manga iti e honohono kau ana
Ka hono, ka tupu hei awa
Hei awa tupua
E rere kau mai te awa nui
Mai i te kāhui maunga ki Tangaroa
Ko au te awa, ko te awa ko au