Tau ana ki te pae o Ruapehu maunga
Ka tiehua te wai ko Whangaehu
Hoea rā te waka o Kurahaupō
ka ū ki uta ki te hapū o Ngāti Hikapīrau.

Haere whakateuru ki te maunga titōhea a Taranaki
tiro whakararo ki ngā wai riporipo o Waiongona
ki te waka o Tokomaru.
Tau atu rā ki te hapū o Puketapu.

Ka peka atu ki roto o te rohe pōtae
ki ngā pukepuke o Pureora maunga
ki ngā wai tukukiri o Waimiha
ki te tūpuna rā ko Rereahu hapū

Nei rā a Ngāti Apa, a Te Āti Awa, a Ngāti Maniapoto e mihi nei.

Te Ruahuihui Hiroti
Poutokomanawa
Kaiako o te rōpū Pōhutukawa
Te Whānau Te Pihinga

Ehara tāku maunga i te maunga nekeneke engari he maunga tū tonu mai onamata. Ko tōna mana tuku iho nō tuawhakarere. Ko te ahikā roa nā Uepohatu, nā Te Aitanga a Mate, nā Te Umuariki.
Kei raro i te koroua a Hikurangi ko te puke maunga ko Manutahi. Ko te kōawa o Mangahānea e māturuturu ana i muri i te marae o Mangahānea. E rere āku mihi ki taku whare tipuna kōka ko Hinetāpora. “Ahakoa tōna kōtahi he manomano kei muri i a ia”.
Ka huri au ki ngā pari toka o Tawhiti-nui-a-Paoa whakawhiti atu ki ngā tai e papaki i te raenga o Mataahu. Koia ko te kāpata kai o Waipiro ākau, te tai i whāngai i ngā uri o Te Whānau-ā-Iritekura. Nā te tipuna nā Tuwhakairiora a Iritekura i tono
“Haramai ki Waipiro. Ina ngā pungarehu a ō tungane”

Nei rā tēnei Wīwī Nāti o te urunga o te rā rā e mihi ana

He nawe kei roto i o mahara, kei roto i o tikanga e hine e!

Rere arorangi taku manu aute ki te motoi o Hikurangi, a Taranaki maunga
hora nei ki runga ake o Waiapu, Oakura awa
te tumu herenga o aku waka a Horouta , Kurahaupo
kohiri ake ki nga whare tupua a Pakirikiri ki Tokomaru, Oakura Matapu
purea nga hau maringiringi ki aku hapu a Te Whanau a Ruataupare, a Nga Mahanga -a Tairi
Aku nui, aku rahi nei a Ngati Porou, a Taranaki tuturu e mihi nei