Tini whetū ki te rangi Rangitāne ki te whenua”
Nei rā te mihi ki tōku koroua ko Te Oti Eruera Turei. Nāna ahau i whakaingoa ki te ingoa o tōna kuia arā, a Merenea. I korowaiatia e ngā pae maunga o Tararua te awa o Ruamahanga. E hoe ana te waka o Kurahaupo te Iwi o Rangitāne. Ka puta te hapū o Ngāti Moe ki te marae o Papawai.
“E rere kau mai te awa nui mai te Kāhui Maunga ki Tangaroa, ko au te awa, ko te awa ko au”

Nei rā te mihi ki tōku kuia ko Agnes Piupiu Taputoro. Nāna anō ahau i manaaki, i tiaki i taku tipuranga. Ko Ruapehu te maunga ahi kōmau ki te wairere o Whanganui. Ka hoea te waka o Aotea ko te iwi o Te Āti Hau nui a Paparangi, heke mai ki te hapū o Wainuiarua.
Ko Meranea Turei tōku ingoa. Ko ahau te kaiako o Kāpuka.

Hoki ake au ki tōku tūrangawaewae, ki Te Tairāwhiti.
Tū ake au ki runga i tōku maunga rongonui, arā, ēhara tōku maunga i te maunga nekeneke, he maunga tū tonu a maunga Hikurangi, kia pūrea e ngā hau o Tāwhirimātea.
Titiro whakararo ki ngā wairiporipo o tōku awa o Waiapu. Kite ai i ngā hoea o tōku hapū a Te Aitanga-ā-Hauiti e hoe ana i tōku waka o Horouta ki tōku marae o Puketawai.
Mā reira ka taea te kite i tōku iwi a Ngāti Porou e mahi ngāhau ana. Kātahi ka huri tōku aro ki ngā wai o tōku moana a Kaiaua e aki kau ana.
Tēnei he uri nō Te Urunga mai o te rā, Nō Porouāriki tangata, nō Porouāriki tipuna e mihi nei.

Mererangi Moore

Tērā te uira e hiko i Aorangi, te tohu o Pohokura, Kaitiaki o te iwi. Ki Rangitīkei e ripo atu rā, te pīkautanga o ngā awa ki a kiwa. Rere tika te haere ki te Riu o Puanga, kia mihihia ōku tīpuna whare. Ki Ōruamatua i Whitikaupeka o Ngāti Whiti, Tūwharetoa. Ka titiro tītaha ki Tumakaurangi o Ngāti Tama, Tūwharetoa. Te Taha o Pipiri e mokemoke mai rā, te karere ki te uru ko Rangituhia. Ko koia e ara e.

Tahuri kau ana ngā wai whiria o Rangitīkei ki te tonga, ki te pae tapu o Taumata-o-te-rā. Ko Manomano te whare whakaruruhau, e noho piri ana ki te maru o Ruahine. Ko te Heke Whirinui, ko te Heke Kariritahi, ko te Heke mai-i-raro. Ka tū, ka ora Ngati Raukawa-ki-te-Tonga, Ngāti Manomano e. Tōku tūpunā kuia, he Purutanga o te Mauri. He kakanō au i ruia mai i Rangiatea.

“Ko te kōrero kia haere ahau, ko tāku kia noho ahau. Koia ahau ka kī - Ka eke rawa aku toto mō tēnei poraka.”
Anei au te uri whakaheke o te kaupapa Whakatupuranga e mihi ana.