Te Kura Māori o Porirua

(04) 235 9617 tari@kura-porirua.school.nz 392 Warspite Ave, Ascot Park, Porirua 5024

Poumua

Grace Taniora
Role

Kaiako - Kōwhai

Email

g.taniora@kura-porirua.school.nz

General Information

Taku taha WHATUKURA
Kia Hora te marino
Kia Whakapapa pounamu te moana
Kia tere te Kārohirohi
Tū ana au ki te tihi tapu o Tuhua heke iho ki te maunga
aroha ko Hikurangi e rere ngā wai ki Taringamotu
ki Ngakonui. Tukituki ōku waka ki uta ko Tainui,
ko Te Arawa Anga atu taku kānohi ki te marae ko
Hia Kaitupeka. He tū mātaara mō ōku iwi Ko Ngāti
Maniapoto, ko Ngati Tūwharetoa hei whakamarumaru i ngā uri whakatūpu o Ngati Hari e mihi manahau nei.

Taku taha MAREIKURA
He tūhono whakapapa a Tararua horahia i te whenua
E rere ana ngā wai koropupu o Punahau ki Arawhata
ki te wahapu o Hokio
I tāmoko ai i ōku tūpuna i taku waka Ko Kurahaupo
ki tōku marae a Kohuturoa rāua ko Kawiu. He
pipiwharauroa au o tōku iwi a Muaūpoko. E noho ana
au ki raro i ngā parirau o tōku hapū Ngati Pariri.

Nā Grace (Turu) Taniora

Kia mau tonu ki tēnā
kia mau ki te kawau mārō
Whanake ake! Whanake ake!

Te Ruahuihui Hiroti
Role

Kaiako - Pōhutukawa

Email

tr.hiroti@kura-porirua.school.nz

General Information

Tau ana ki te pae o Ruapehu maunga
Ka tiehua te wai ko Whangaehu
Hoea rā te waka o Kurahaupō
ka ū ki uta ki te hapū o Ngāti Hikapīrau.

Haere whakateuru ki te maunga titōhea a Taranaki
tiro whakararo ki ngā wai riporipo o Waiongona
ki te waka o Tokomaru.
Tau atu rā ki te hapū o Puketapu.

Ka peka atu ki roto o te rohe pōtae
ki ngā pukepuke o Pureora maunga
ki ngā wai tukukiri o Waimiha
ki te tūpuna rā ko Rereahu hapū

Nei rā a Ngāti Apa, a Te Āti Awa, a Ngāti Maniapoto e mihi nei.

Te Ruahuihui Hiroti
Poutokomanawa
Kaiako o te rōpū Pōhutukawa
Te Whānau Te Pihinga

Keanu Andrews-Sio
Role

Kaiako - Putaputawētā

Email

k.andrews-sio@kura-porirua.school.nz

General Information

Tū ana au ki te tihi o Rangiahua maunga
Anga whakararo ai taku haere ki tōku awa a Wainui
Ki reira kauhoe atu ki runga i tōku waka haunui a Tainui
Hoe tahi ana ki raro i tōku tūpuna rangatira a Hoturoa
Tau ana ki roto o te Waiariki ki Torere

Tahuri taku aro ki te rāwhiti ki te maunga o Tihirau e tū whakahīhī ana,
Ki te awa pōkarekare o Whangaparaoa
Tū ai ko Te Whānau-ā-Apanui ki mua i te poho o Kauaetangohia marae

Ka peka atu ki te maunga titōhea o Taranaki ki a Ngāti Tūpito
Koia ko Aotea waka e pari i ngā tai o Pāteanui awa
ki tahaki o Taiporohenui whare tūpuna

Nei rā te uri o Ngaitai, o Te Whānau-ā-Apanui me Ngāti Ruanui e tuku manahau atu i ngā mihi.
Keanu Andrews, Kaiako Poumua, Te Whānau Te Pakiaka

Juanita Teepa
Role

Kaiāwhina

Email

j.teepa@kura-porirua.school.nz

General Information

Huakina mai te tatau o te Pō kia kite atu ai au i ōku mate. Ka kakapa ake taku manawa ki ngā whetū, ki te marama ka tau kei te rua. Kātahi nei au ka kite i te hē, kātahi nei au ka kite i te mate. E ngā tīpuna kua riro kei tua kei Paerau, kei te huinga o te Kahurangi, okioki mai rā koutou

Ko Maunga Pōhatu te pūmanawa o Te Ika ā Māui.
Ko Ōhinemataroa te waiora.
Ko Te Urewera te mārama.
Ko Ngā-Pōtiki te hapū.
Ko Papatūānuku te waka.
Ko Juanita Teepa ahau.
Toitū te whenua.
Toitū taku tū.
Toitū taku kupu.
Toitū tōku mana tangata.

Glenys Turu
Role

E wātea ana a Glenys i te tau nei, kia wānanga ia i ngā kaupapa ako. Ko ia te kaiako o Putaputawētā

Email

g.turu@kura-porirua.school.nz

General Information

E rere rā taku manu ki ngā pae maunga o Tararua,
heke whakararo ki te Waipunahau, he wai mahara,
he wai karekare-a-roto. Ka pūhia haeretia e te hau,
ka āpitia e te kohu au moana, ka oti atu ki te moana tere ai,
whakaea rawa atu ko Kurahaupō.
Ka tau ki ngā pātuwatawata o Kohuturoa, o Kawiu
hei ūkaipō mō ngā uri o Muaūpoko.

Piki ake taku manu ki ngā hiwi me ngā puke o te motu
kia tatū rā ki Te Nehenehenui. Ka kitea te mana me te tapu o te maunga Tūhua,
hei tohu mahara i a Tūtetāwha i a Te Kanawa mō ngā iwi e rua.
Ko Ngāti Tūwharetoa tērā, ko Ngāti Maniapoto hoki tērā.
Rukuhia, rukuhia ki ngā wai tuku kiri a ngā mātua tūpuna,
ko Ngakonui, ko Taringamotu.
Hoea mai ki te waka o Te Arawa i Hawaiki rā ano e
Ngatoroirangi.

Kua hora te marino, kua whakapapapounamu te moana,
kua tere te kārohirohi kia whakauruwhenua a Tainui waka ki uta.
Ka herea ki ngā poupou o te whare o Hari ki te marae o Hia Kaitūpeka
hei papa kainga mō te hapu o Ngāti Hari.
Ko whaea Glenys Turu tēnei e mihi atu nei.

Tuhiwai Hauiti-Parapara
Role

Kaiāwhina - Pou Tuarongo